احنا اتفقنا ان كل واحد بيكون ليه رساله .... مش شرط تكون رساله واحده م الالفللياء زى ما تفضلتى وقلتى .وطبعا الرساله دى مش فى مجال واحديعنى تقدرىتحددى رسالتك
اسمحلي هلغبط الترتيب بتاع الرسايل شويه: ومبدأيا هما كلهم داخلين في بعض يعني لو هنرسمهم بيانيا...هتبقى دائرة كبيرة هي الرسالة الدينية، وفيها دوائر صغيرة اللي باقي الرسايل.. "قل إن صلاتي ونسكي ومحياي ومماتي لله رب العالمين" الرسالة الدينيه ؟ على المستوى الشخصي: أختم القرآن الكريم هذا العام بإذن الله. ودي طبعا في حد ذاتها مش رسالة وإنما عبادة...ولكن كي يتيسر لي أداء رسالتي فعليّ التسلح بالمعينات الربانية اللي إن شاء الله تساعدني على أدائها..
على مستوى الأمة: أساعد في توضيح صورة ديني الجميلة أمام من لا يدينون به... وأتمنى أن يعينني الله أن أكون داعية مخلصة وأساهم في إحياء أمتي..إني أكون سبب في هداية ناس كتير لطريق ربنا سبحانه وتعالى..
الأخلاقية؟ بصراحة شايفه انها متضمنة في الرسالة الدينية لأننا أمة قائدها صاحب الخلق العظيم... فلما بندعي لدينه يبقى بندعي لأخلاقه يعني للكمال كله..
الاجتماعيه ؟
على المستوى الشخصي: إذا ربنا سبحانه وتعالى قدر لي الزواج فرسالتي إني أكون زوجة صالحة ناصحة أساعد زوجي في انه يكون شخصية عظيمة و نتعاون على رضا سبحانه وتعالى ونصرة دينه... وفي نفس الوقت أتمنى أكون زوجة بتقرب زوجها من إخواته ومن أهله.. يعني تكون بتلم شمل العيلة...وبرضو أكون عمة وخالة متعاونة مع كل عيلتي.. وقبل كل ده طبعا إني أكون بارة بوالدي ومحبة لإخواتي...
على مستوى المجتمع: أساعد في إنقاذ أكبر عدد من الأطفال من التشرد...
العلميه ؟
أكون مترجمة محترفة علشان أحقق رسالتي الأصلية اللي هي تعريف الغرب بالصورة الصحيحة للإسلام.
أدرس وأتخصص في مجال التنمية البشرية لأني بعشق مجال علم النفس... وأتمنى تكون لي بصمة فيه.
. لما بتسرحى بخيالك كده بعد 10 سنين . بتشوفى نفسك ازاى ؟
إذا ربنا كتبلي أعيش 10 سنين ... لو كنت متزوجة: هيكون زوجي إن شاء الله بقى شخصية عظيمة....وأنا الإمرأة التي كانت وراءه... وساعتها هكون نجحت لأن نجاحي في نجاحه... ولو مكنتش: فإن شاء الله أكون داعية باللغة الإنجليزية.. ومترجمة محترفة جدا ويكون ربنا وفقني وعملت مبلغ كبييييير ويكون عندي مؤسسة خيرية كبيرة معنية بشئون "الإنسان" في كل مكان... وخصوصا أطفال الشوارع.....
ما شاء الله ربنا يجعلك هدف لنصرة الاسلام والمسلمين ان شاء الله وربنا يحققلك كل احلامك ان شاء الله وان شاء الله كمان تعملى المبلغ الكبيييييييير ده وتعملى المؤسسه الخيريه (بس طبعا هتكون جزء من جمعيتنا) ......
بس انتى قلتى ان اقتصاد وعلوم سياسيه كانت حلم من احلامك . ليه ؟
وهل بعد ما دخلتى الكليه لقيتيها زى ما كنتى بتحلمى بيها ؟
طب هل كان لدراستك تاثير على طريقة تفكيرك فى الحياه . ولا كل حاجه كانت ماشيه فى اتجاه لوحدها ؟
انتى قلتى ان اقتصاد وعلوم سياسيه كانت حلم من احلامك . ليه ؟بفضل الله أنا بحب القراءة من وأنا صغيرة وبابا –ربنا يحفظه- كان بيحب جدا الموضوعات السياسية... فمكنش بيقرا غير في السياسة أو الدين ومش بيتفرج غير على النشرات والبرامج السياسية(دا لأن زمان مكنش لسه الدش والقنوات الفضائية انتشرت بالشكل ده) ..فمن خلال القراءة حبيت أعمل حاجة عظيمة زي الناس اللي بقرألهم إضافة لإني كنت بستريح قوي لشكل عمرو موسى- اللي مصدقتش نفسي لما قابلته وكلمته في كليتنا- فسمعت مرة اسم الكلية فحسيت انه مميز قوي (وده مش تقليل من شأن أي كلية أخرى) وحطيتها في دماغي... من وأنا صغيرة بابا وماما والعيلة كانوا بيقولولي يا دكتورة ..مش عارفة شاكلي كان مدي على دكاترة باين ولا ايه... المهم أنا كنت فاكرة ان سياسة واقتصاد مش بتاخد غير أدبي...فقررت بيني وبين نفسي إني أدخل أدبي...وفي نهاية أولى ثانوي كان في الاستمارات اللي بنكتب فيها أدبي ولا علمي دي..أنا طبعا منمرة عليها وقلت هدخل أدبي من غير جدال....لما رجعت بوري لبابا الاستمارة صُعق لأن كده إيمان مش هتبقى دكتورة وزعل مني، فأناأقسمتله إني لما هدخل أدبي مش هقل عن سياسة واقتصاد... والحمد لله قدر ربنا إن حلمي يتحقق...
واسمحلي أضيف على سؤالك سؤال تاني:
كنتي بتحلمي بايه بعد سياسة واقتصاد؟؟ كنت بحلم إني أدخل جامعة الدول العربية وأفضل أتدرج في المناصب لغاية ما أبقى الأمين العام ليها....طبعا مكنتش هتبقى بوضعها الحالي....لااااااااا كان في دماغي برنامج مختلف تماما أخاف شرحه يطول عليكو..
وهل بعد مادخلتى الكليه لقيتيها زى ما كنتى بتحلمى بيها ؟ طبعا لأنها كلية عظيمة بتخرج سفراء ودبلوماسيين فأكيد فيها مواد خطابة وبلاغة تعلمك ازاي تبقى دبلوماسي مفوه، ومواد في التفاوض(التطبيقي مش النظري) تعلمك ازاي تبقى مفاوض ناجح، ومواد في الاتيكيت واللباقة (لأنك بتمثل بلدك ولازم تكون في قمة البهاء) فضلا عن ان قراءة الجورنال ومتابعة الأخبار العالمية دي مادة أساسية وعليها درجات...... وحاجات كتييييييرر جدا كل ده كنت بحلم ألاقيه في الكلية، وبفضل الله ملقيتش أي حاجة من دي..صحيح مواد جامدة ودكاترة أجمد، بس للأسف كله نظري يعني اللي بيدح قوي وبيحفظ من غير مابيفهم ممكن جدا يتألق مع انه يكاد يكون مش عارف حتى عاصمة إسرائيل اسمها ايه... بس ده مش معناه إن الكلية وحشة ...لأ طبعا بالعكس.. العيب فيا إني زي ماقلت قبل كده ببقى مثالية شوية في التفكير..طب هل كان لدراستك تاثير علىطريقة تفكيرك فى الحياه . ولا كل حاجه كانت ماشيه غى اتجاه لوحدها؟ الدراسة مش هي اللي بتأثر على طريقة تفكيرك، وإنما طريقة دراستك هي اللي بتأثر على تفكيرك... يعني كلنا درسنا نفس المواد بس مش معنى كده ان كلنا بقينا بنفكر بنفس الأسلوب- وده مش تقليل من أسلوب حد بالعكس اختلاف الأساليب ده شيء طيب-....أكتر حاجة علمتهالي الكلية هي انك تبقى واسع الأفق ودماغك بفضل الله مهيأة إنها تستوعب مستوى عالى وانك بتقابل ناس مهمين-عالأقل بتشوفهم-....
تخيلى ان انتى وزيرة الخارجيه المصريه . ايه اول قرار هتتخذيه ؟
وايه اللى ممكن يخلى الزعماء العرب يتجمعو تانى على طاولة المفاوضات من غير ما ينتهو - كالعاده- من غير قرار ؟
تخيلى كمان ان انتى الامين العام لجامعة الدول العربيه . وقلنالك قوليلنا خطه زمنيه فى صورة خطوات بحيث مع انتهاء الخطه دى يكون بقى فيه حاجه اسمها اليد العريبه الواحده ؟
من وجهة نظرك . محاولة مصر فى توطيد علافاتها الخارجيه كانت من اسباب انتشار الفوضى الداخليه ؟ ولا كله تمام ياباشا والرعيه بيبوسو ايد سعادتك والسياسه الداخليه زى الفل !!!!!!؟
] بمناسبة الكلام بقى عنالسياسهتخيلى ان انتى وزيرة الخارجيه المصريه . ايه اول قرار هتتخذيه؟ أكيد هبعت أجيب سفيرنا في إسرائيل، وأطرد بعثتهم من عندنا وأأمر بنسف سفارتهم ونعمل مكانها مقلب قمامة لأن دي الحاجة الوحيدة اللي ممكن تقبل تقعد مكانهم... أكيد لو أي حد منكم مكاني هيكون ده أول قرار ليه.... بس أنا بقى هبدأء بحاجة تانية قبل دي...هشوف المصرين اللي كرامتهم ضايعة في الدول التانية..مهو ماينفعش أبقى عاملة زي الأب اللي عامل يصالح بين الناس وسايب عياله عمالين يخدوا على دماغهم من ناس تانية... فأول حاجة هعملها إني هتابع أحوال الناس اللي المفروض إني مسئولة عنهم وبتكلم بإسمهم. وايه اللى ممكن يخلى الزعماء العرب يتجمعو تانى على طاولة المفاوضات منغير ما ينتهو - كالعاده- من غير قرار ؟ لما يحسوا بقيمة اللي هما فيه ويسمعوا كلام ربنا سبحانه وتعالى "واعتصموا بحبل الله جميعا ولا تفرقوا" ويعرفوا " كنتم خير أمة أخرجت للناس" ويفهموا إن لا أمريكا ولا الجن الأزرق يقدر عليهم طول هما مع بعض... وقبل ده وده لما يبقوا فعلا قد المسئولية اللي ربنا اداها لهم ..زي مالنبي صلى الله عليه وسلم قال "كلكم راع وكلكم مسئول عن رعيته" ولما يبطلوا تأليه نفسهم ويبطلوا "شخصنة" المواقف ويتكلموا بإسم الشعوب اللي بيمثلوها
ساعتها بس، كل واحد فيهم هينسى انه بيتكلم باسمه وهيفتكر انه مجرد عضو في أمة بيه من غيره كانت وهتكون أعظم الأمم... [b]تخيلى كمان ان انتى الامين العاملجامعة الدول العربيه . وقلنالك قوليلنا خطه زمنيه فى صورة خطوات بحيث مع انتهاءالخطه دى يكون بقى فيه حاجه اسمها اليد العريبه الواحده ؟أول حاجة هعملها: هقفل جامعة الدول العربية وهعمل بدالها: جامعة الشعوب العربية... الشعوب اللي هي ضمير الأمة الحي... الشعوب اللي من كتر مايأست ان حد يسمع لصوتها، مبقتش بتتكلم...الشعوب اللي لو سبناها تهجم بدون سلاح على إسرائيل هتبيدها من على وش الأرض... والجامعة دي هيبقى ليها مراكز في كل الأقطار العربية مهمتها تذكير الناس بحدوتة قديمة زمان كانوا بيحلموا بيها وهي "الوحدة العربية"... الجامعة دي هيبقى أعضائها أفراد بسطاء من الشعب زي وزيكم ، أقصد زيكم بس لأني وزيرة وانتو لأاااااااااا ههههههه- مش ناس بيلبسوا ويتشيكوا عالفاضي من دم الشعب..
تاني حاجة: هعمل "مجلس الشباب العربي" اللي هما قادة الأمة الصغيرين... وأعضاء المجلس هيكونوا الشباب العربي اللي هما احنا..اللي بيحبوا امتهم وغيورين عليها وفخورين بيها ... المجلس ده هيربي شباب عارفة يعني ايه امتها ... هيتم فيه تبادل وفود الشباب في كل الجامعات العربية (سواء جامعات أو أي مؤسسات تعليمية أخرى) بحيث اننا نربي ناس على دراية فعلية بأحوال أمتها...
أفتكر لو ده حصل وقدرنا نآلف بين شباب الأمة وادينا الفرصة للشعوب المكبوتة تعبر عن اللي جواها.... مش هتبقى في حاجة اسمها اليد العربية الواحدة ولكن هتبقى اليد العربية الجامدة ...
من وجهة نظرك . محاولة مصر فى توطيد علافاتها الخارجيه كانت من اسباب انتشار الفوضى الداخليه؟ولا كله تمام ياباشا والرعيه بيبوسو ايد سعادتك والسياسه الداخليه زى الفل !!!!!!؟[/b]
الاول قدامك لوحه ومعاكى الوان ....... هترسمى ايه ع اللوحه وهتكتبى ايه تعليق ع اللوحه دى هرسم شجرة وارفة الظلال في وسط صحراء قاحلة وبيتدفق من جذع الشجرة دي نهر (جدول) صغير وطول ما هو بينساب؛ بتنبت شجيرات وزهور صغيرة على جانبيه... تعليق الصورة: هذا ديننا!!
التانى طريق طويل ومستقيم وانتى شايفه النور اللى فى الاخر وطريقتانى مش مستقيم بس اقصر وبيوصل لنفس النور هتمشى فى الطريق الاول ولا التانى ؟وليه ؟ الأول طبعا ليه؟؟؟ مصداقا لقوله تعالى: "وأن هذا صراطي مستقيما فاتبعوه ولا تتبعوا السبل فتفرق بكم عن سبيله" التالت ورده وبندقيه لمين هتهدى الورده وهتصوبى البندقيه علىمين ؟ الوردة ههديها بلا تردد للنبي صلى الله عليه وسلم ومن الناس: لأمي (شفاها الله وعافاها ومن يد الرسول سقاها) البندقية: هصوبها على الظلم (كل بنى آدم ظالم)
الرابع قائد طياره واتصل بيكى وحكالك ان معاه اربعه فىالطياره وباراشوت واحد ممكن يدى البراشوت لمين؟
مع العلم ان الطياره دى هتقع كمان 10دقايق طبعا محدش يتمنى أبدا انه يبقى هو اللي هيقرر مصير اللي قدامه... لكن لو قتلنا مشاعرنا خالص وخلينا عقلنا بس هو اللي يتكلم؛ فأنا هختار: رب الأسرة: لأنه مش بيمثل روح واحدة ..لأ..ده بيمثل تسع أرواح ممكن تتشرد أو تنحرف أو حتى تتعرض للاعتداء من بعده –مع إيماني بإن ربنا هو الرزاق وأكيد مش هيتخلى عنهم... بس ده هيكون اختياري... والعقل برضه ممكن يبرر ليه مش الناس التانية: أما ابن القائد فممكن يتربى كويس في حضن مامته.إضافة إن باباه طيار فأكيد هيبقى سايبلهم على الأقل دخل شهري....وممكن أوي الولد يطلع قائد كبير تأسياً بباباه.. الطفل الصغير : "فأردنا أن يبدلهما ربهما خير منه زكاة وأقرب رحما" وممكن قوي الطفل ده رغم ذكائه ونبهاته أنه يستعمله في عير مصلحة الأمة... السيدة الحامل: هي ممكن تموت وهي بتولده..أو هتاخد أجر الشهادة زي ماوعدها النبي صلى الله عليه وسلم..
من طرف الملاك الحائر الإثنين مارس 09, 2009 1:02 am
طب لو حاولنا نتكلم بقى عن ....... انسهايمان التانيه
اسمحلي-كالعادة- ألغبط ترتيب الأسئلة، وأبدأ بالسؤال التاني
امتى اصلا عرفتى انك عايشه كده ؟ وأنا في سنة أولى كلية... طبعا لما دخلت الكلية دي كانت حياة مختلفة تمااااااما عن كل حياتي اللي عشتها قبل كده، والسبب في كده مش للكلية نفسها لكن للمدينة الجامعية اللي قضيت فيها أجمل أربع سنين في عمري وعرفت فيها كل حاجة حلوة وأجمل صحبة شفتها في حياتي وبجد أنا كنت بعتبرها جنتي على الأرض... الحمد لله ربنا كان رزقني بصحبة صالحة جدا جدا جدا ناس كانت بتحب ربنا قوي وقلوبهم جميلة وصافية بشكل مكنتش شوفته قبل كده... المهم لقيت مجتمع تاني ملتزم قوي ماشاء الله بيصلوا الصلاة على أول وقتها في جماعة-الحمد لله أنا كنت مواظبة على الصلاة من وأنا صغيرة بس كانت صلاة مختلفة شوية- مش بيسمعوا أغاني، بيصلوا الفجر في جماعة، بيعملوا حلقات ذكر جميلة قوي، بيحفظوا قرآن، بيغضوا بصرهم...... وحاجات كتيرة جميلة جدا أنا كنت حباها ومعجبة بيها بس مكنتش بعرف أواظبط عليها قوي خصوصا الفجر والأغاني... المهم مرة اتضايقت قووووووي من نفسي وحسيت اني مش عارفة أبقى زي الناس دي اللي كانوا بيساعدوني جدا ومحتضنيني قوي؛ بس أنا مكنتش عارفة أواظبط على الطاعات ، وخصوصا الفجر اللي الدور كله كان بيجي يتحايل عليا علشان أصحى-ربنا يعفو عنا ويسامحنا-
فمرة كنت محتاجة أفضفض مع حد وكانت صحاباتي مش موجودين... فاشتريت كشكول صغير... وبدأت أعمل حوار مع نفسي واسمحولي ألخصلكم جزء منه:
أنا:................................... نفسي: يااااااااااااااااااه مش قادرة أصدق نفسي ايه الغيبة طويلة دي!!!! أنا:.............................. نفسي: ياخبر!! قوي قوي دا أنا كان نفسي في الحوار ده من زماااااااااااااااان..أهلااااا بيكي بجد أنا مش قادرة أصدق نفسي... أنا:.................................... نفسي: مني أنا؟؟؟ ليه بس كده حرام عليكي؟؟؟ أنا:.......................................... نفسي: أنا اللي أمارة بالسوء؟؟عموما الله يسامحك بس أحب أقولك حاجة صغيرة قوي؛ لو كنتي محتاجة توصفيني يبقى تقدري تقولي اني "نفس متدلعة" وانتي اللي دلعتيني..انتي اللي عملتي فيا كده..دا أنا ساعات كتير بقعد اتتريق عليكي...بجد مش بتخلي نفسي في حاجة؛ وبتديلي أكتر من اللي بطلبه...الناس كلهااااااا بتقوم تصلي الفجر كان نفسي مرة تعاقبيني أو عالأقل تهدديني وأنا والله كنت هسمع كلامك؛ بس لقيتك ضعيفة جدا معايا..................الخ أنا:.............................. نفسي: لا طبعا تقدري تعملي وتعملي حاجات كتير كمان، اتفقي بس انتي معايا على حاجة وأوعدك إني هساعدك. أنا:............................. نفسي: اه طبعا هبقى معاكي عالشيطان أنا عارفه ألاعيبه كويس... أنا:........................ نفسي: وأعز صديقة كمان!! . . . . . . الخ وبجد والله بدون مبالغة لقيت بني آدمة تانية بتكلمني وبتقولي كلام عمري ماكنت أعرفه... ومن ساعتها بقيت لما يبقى عندي أي مشكلة أو حاجة محتاجة تصرف كويس فيها أو حتى مشاورة، بروحلها علىطول، وفعلا بتفكرني بحاجات جميلة قوي مكنتش واخدة بالي منها... ومن غير ما حد يفتكرني مجنونة ولا حاجة،احنا أحيانا بنخرج مع بعض ولما أكون عايزة أشتري حاجة هي اللي بتبقى معايا، وساعات لما يبقى عندي موقف محتاجة فيه تشجيع تبعتلي إيميل أو حتى رسالة عالموبايل...
وبالمناسبة ده مش جنان ولا حاجة، بالعكس مرة سمعت نصيحة إن لو الانسان محتاج يكسب ثقة حد،أول حاجة لازم يكسب ثقة نفسه، لازم يحب نفسه ومايستخدمش اسلوب جلد الذات لأن فاقد الشيء لا يعطيه، فلو نفسك مفتقده الحنان مثلا، فعمرها ما هتعرف تديه لحد...
من طرف الملاك الحائر الإثنين مارس 09, 2009 1:32 am
الاول كده حضرتك قلتى انك عايشه بشخصيتينازاى؟
[b]بدايةً مش أنا بس اللي كده، أي حد ممكن يكون كده، ولو كل حد ادى لنفسه فرصه واتكلم معاها هيكتشف إن في روح تانية معاه... [/b]
[b][b]من غير تفاصيل كتير هما اتنين منهم : واحدة رزينة شوية وفيها شيء من الحكمة وبتحكم على الأمور بنظرة عقلانية.
والتانية: روحها طفولية –بمعنى البراءة- ومرحة و(روشة) شوية .الحمد لله الشخصيتين ممكن يكونوا مختلفتين شوية بس تقريبا بيكملوا بعض؛ يعني مش متناقضتين.. طبعا الاتنين بيحكمهم حب ربنا سبحانه وتعالى والتعلق بيه (والاتنين مثاليين عايشيين في الخيال).... بس واحدة بتظهر في أوقات والتانية بتظهر في أوقات تانية...
مش معنى كده ان سايبه لواحدة فيهم الحبل على الغارب... دي محاولة لتسييس النفس (ترويضها) يعني بدل ما تأمرني بالسوء، أحاول أخدها في صفي وأستعين بربنا على تزكيتها... ربنا سبحانه وتعالى بيقول "وأما من خاف مقام ربه ونهى النفس عن الهوى فإن الجنة هي المأوى" هل معنى كده انك تدبح في نفسك؟؟ لأ طبعا انت ممكن تسايسها وتخليها تسمع كلامك وإذ خالفتك في أمر من أمور ساعدتك على معصية أو ألهتك عن طاعة، لازم تعاقبها بس بالاسلوب المناسب...وتستعين في كده بدعاء ربنا زي مما كان النبي صلى الله عليه وسلم بيدعي "اللهم آت نفوسنا تقواها وزكها أنت خير من زكاها" [/b][/b]
[b][b][/b][/b]
[b][b][b][b] وايه دور الشخصيه التانيه دى فيحياتك ؟ [b]لو جربت انك تقعد فترة طويلة لوحدك.... هتعرف دورها. [/b][/b][/b][/b][/b][/b]
من طرف الملاك الحائر الإثنين مارس 09, 2009 2:24 am
ف جزء من ردك قلتى ان نفسك كتير كانتبتتريق عليكى ...... ازاى ؟ او كنتى بتفهمى دى ازاى ؟
الكلام ده كان قبل ما نتصاحب ونتفق... وكانت تقصد لما قالتلي كده ان الواحد أحيانا بيبقى ضعيف قوي مع نفسه..رغم ان العكس هو المفروض اللي يكون صح...تعرف انت لما راجل كبير صاحب بيت يخلي ابنه الصغير هو اللي يتحكم فيه... تفتكر الابن ده جوا نفسه مش بيتريق على باباه ازاي سايبني بتحكم فيه كده.... ده كان المقصود من كلامي
ونفسك قالتلك انك ولامره عاقبتيها او هددتيهاانتى شايفه ان عقاب النفس دى ممكن يكون ازاى؟اسمحلي هذكر موقف عاقبت فيه نفسي بدل ما اتكلم...مع الأخذ في الاعتبار ان ده مش مقياس ولا هو ده الاسلوب اللي المفروض كل واحد يتبعه...كل نفس وليها أسلوبها.. مرة نفسي شالت من واحدة أخت ليا في الله –مكنتش صافية ليها يعني- مع ان الأخت دي أحسن مني تريليون مرة... علشان أعلمها ازاي هيكون أسلوبي معاها لو فكرت كده تاني، جبت أشيك طقم عندي كنت بحبه جداااا واديتهولها هدية.. طبعا نفسك لما تعمل معاها كده هتحرم تقع في الغلطة دي تاني... ده موقف وإن شاء الله لو ربنا قدر لي الزواج والإنجاب لازم أعود أولادي وأربيهم على كده.... لأن ده مش بيخليهم متعلقين بالحاجات الدنيوية دي.
اتفقي بس انتي معايا على حاجة وأوعدك إني هساعدك.ازاى؟ يعني مثلا اتفقي معايا اني لو مش غضيت بصري مرة؛ هستغفر 5 مرات.. [b]أو نحدد ذكر نقوله أو طاعة معينة نعملها مع بعض.
وساعات لما يبقى عندي موقف محتاجة فيه تشجيع تبعتليإيميل أو حتى رسالة عالموبايل... دى بقى مش فاهمها اطلاقا هى شخصيه خياليه ولا ليها معالم ماديه ؟ يعني مثلا لما ببقى متضايقة وطهقانة من حاجة في الشغل-والحال هكذا دوما ولله الحمد من قبل ومن بعد- تبعتلي(أو أبعت لنفسي يعني) إيميل تصبرني فيه وتعرفني ان دهكله هيهون وبكره نفتكر الأيام دي ونضحك... ومرة باركتلي لما أوباما فاز، وقالتلي كان حلم بعيد المنال ووصله ومسير كل حد بيحلم هيوصل لمبتغاه....وكده يعني
بصراحه انا مكنتش ناوي اضيف اي تعليق لغاية ما تخلصو حواركم بس لغاية كده ومقدرتش ولازم اعترفلكم انه احلى حوار انا شفته على النت حوار جميل جدا جدا واسئله اكثر من متميزه سلسه وهادفه والردود غاية في الجمال والأبداع والذكاء والإيمان ربنا يبارك فيكم . فقلت لازم ارد وأبدي اعجابي الشدييييد جدا بالحوار الجمل اوي ده . مع خالص تحياتي وربنا يحققلك كل احلامك يا انسه ايمان
وكأنك مكنش ينفع تيجي الجمعية غير في الفترة دي بالذات
ويمكن يكون كلامي هنا شخصي شوية..........بس انتي جيتي في مجتمع كل اللي فيه
محتاج خمسين الف سنه عشان بس يتقال علي كلمة "عادي"
ويمكن بنسبة كبيرة كتير منهم ليه اتنين جواه وهوا بس عباره عن غطاء ليهم
ومن كلامك ومن غير مجاملة حصل بينهم ألفه وكأن كان فيه شوية تراب محطوطين في النص وكل واحد فيهم خايف ليعدي للتاني لحسن يوسخ نفسه ودلوقتي جه واحد مهم يشيل التراب ده لقى التاني برده رايح يشيله معاه ولأ ول مرة ساعدوا بعض وفكروا مع بعض
جزاكي الله خيرا....................وثبتك الله على كل ما يحب ويرضى
من طرف الملاك الحائر الأربعاء مارس 11, 2009 1:25 am
في البداية بشكر ربنا سبحانه وتعالى على هذا الحوار اللي بفضل الله استفدت منه فعلا... وما كان من توفيق فهو من منه وكرمه وستره.... وما كان من خطأ أو تقصير فما هو إلا مني ومن الشيطان. [b]ثانيا: أخص بالشكر المحاور البارع على أسئلتة المتميزة اللي فعلا كانت بمثابة Brain Storming وهي حالة تسمى "العصف الذهني" ... تجعل الذهن يلقي بأفضل ما فيه... فجزاه الله خير الجزاء
ثالثا: الشكر كل الشكر لكل اللي تابع معانا ويارب يارب تكون كل كلمة اتكتبت في ميزان حسناتكم، ويكون ربنا قدر ان كلمة من اللي اتقال تفيد أي حد ... ومش هنسى دينا وشيماء طبعا لأنهم طول الحلقة بيجيبولنا أكل وشرب يعني مخلوش الواحد نفسه في حاجة... بارك الله فيكم جميعا.. ورزقنا مرافقة النبي صلى الله عليه وآله وسلم في الفردوس الأعلى من الجنة.... بوركتم وأنعم بكم من "صحبة حلوة".....ء [/b]
ربنا يجزيكي خير يا أنسة إيمان أنا فعلا لقيت إجابات كنت عايزها من زمان لاسئلة في دماغي وموازنات بحاول أوصلها ربنا يزيدك ثبات على مبدأك"قل إن صلاتي ونسكي ومحياي ومماتي لله رب العالمين"
السبت يونيو 15, 2013 1:39 am من طرف doodybosy
» ريهـــ (حينما يتحدث القلب والعقل معا) ـــان
السبت مايو 12, 2012 1:50 am من طرف nagat
» فى حب رسول الله..بقلمى : دعاء أحمد
الجمعة نوفمبر 11, 2011 12:32 am من طرف دعاءاحمد
» فضفضة..........(فى حب الله)
الأربعاء أكتوبر 12, 2011 1:16 am من طرف rehan
» My empty house
الخميس أغسطس 18, 2011 10:24 pm من طرف rehan
» ناقش الي بعدك بسؤال
الأربعاء أغسطس 17, 2011 10:30 pm من طرف 7ob El-7iah
» عندما يتمثل الدين في الأنثى
الثلاثاء يوليو 26, 2011 11:48 pm من طرف rehan
» حلوه بلادي
الإثنين يوليو 25, 2011 2:55 am من طرف rehan
» يامن تقول أحب محمدا............
الثلاثاء يوليو 19, 2011 7:52 pm من طرف rehan
» ادخل طمنا عملت ايه فى الامتحان؟؟؟؟؟؟؟؟؟؟؟
الإثنين يوليو 18, 2011 2:43 pm من طرف rehan