حب مصر ميت ألف فرصه عشان أسيب مصر

ميت ألف فرصه عشان أسيب مصر
ولا عمري سبتها


علشان هى بلادي اللي بجد بحبها
بحبها بكدبها وصدقها


بحب فيها أصالة وندالة أهلها
بحب فيها السهر

بحب
زيفها وأصلها


بحب فيها طلعه الشمس
تنور وشها


بحب فيها القمر طالع
يغازل حسنها


بحب فيها المشي علي شط
نيلها وبحرها


بحب فيها بناتها
راسمين ملامح شعبها


دي بنت مايصه وحاطه
ورده فـ شعرها


ودي بنت جد ونازله
جري لشغلها


هتلاقي فين بلد
فيها الكنايس والجوامع
بتحضن بعضها


مسلم مسيحي إخوات
راضعين طيبة من صدرها
نبع الحنان ويناموا حاضنين
أرضها


هتلاقي فين تاني بلد
كل حاجه فيها
تخليك تحبها


هتقولي ظالمه هقولك
برضو بحبها
هتقولي ضالمه
مهو ده سواد شعرها


هتقولي زحمه هقولك
علشان بنعشق أرضها


هتقو لي فيها فساد
هقولك ده من طيبه شعبها


جرب كده تسهر ولو وحدك
علي ضف نيلها وحبها
جرب تشوف بنت حلوه
مع شاب واقف جمبها


بيحبها شايل في قلبه
هموم الدنيا كلها
وبرضو بيحبها


جرب كده تاكل دره وترمس
علي شطها


وتشوف وشوش الناس
وإضحك زيها


طب وإنت ماشي لوحدك
ووقعت في مشكله
مش بتلاقي ألف واحد
جمبك بيحلها


لا تعرفهم ولا يعرفوك
بس جمعكم حبها


اهي هي دي مصر
زاحمه ظالمه
فاسده ضالمه مش مهم
ده كفايه خفت دمها
هأفضل لمصر أقول وأعيد
أنا أصلي عاشق أرضها

وطبعا ده كله كلام في الهوا
أنا لو تجيني نص فرصة هقول لها
بالسلامه يا مصر
ومش عايز أشوف وشها
وهي دي بقى ندالة أهلها

اظاهر انك مش عارف قيمة مصر؛وعارف لو جتلك فرصة وسبتها ؛هتعرف قيمتها فى الوقت ده ؛ لما هتكون فى غربه وساعة لما تتالم او تكون مهموم مش هتلاقى حد جمبك
مش هتلاقى ابوك وامك بيحضنوك ويخففوا عنك ومش هتلاقى اخوك واختك بيحموك ومش هتلاقى اصحابك الى بيحبوك بجد ؛ مش عشان مصلحة.
ساعتها مش هتقول كدا هتقول ياريت تلاقى نص فرصة وارجع ليها .
غلط الى قال مصر ام الدنيا لان مصر الدنيا كلها

rehan كتب:هى الوحيدة فى قلبى ومفيش غيرها بشتقالها
مهما أشرق وأغرب بردوا لازم أرجعلها
فية كتير مشاكل ونكد وهم بس بردوا بحبها
ومن غيرنا يفكرفيها ويخطط للمستقبل ويشيل همها
بحلم بيوم أرجع ليكى رافع راسك وأقول دا أنا ابنها
اعوض اللى فاتك وبايدينا تانى نرجع مجدها
وأشوفك فى السما عالية وأحسن بلد فى الدنيا كلها

بجد هى دى مصر؛ جزاكى الله خير

سلام عليكم الكلام ده مش بيعبر عن حالى لا والله انا من اشد الناس اللى بيحبوا مصر امنا الغاليه بس ضيقنى كتير من شباب اليومين دول فعلا لو جت ليهم فرصه يسيبوها فعلا هيسيبوها وهما فعلا اللى خسرانين وبجد اللى يعرف الخير اللى فى البلد دى مش هيسبها

ظاهر انك مش عارف قيمة مصر؛وعارف لو جتلك فرصة وسبتها ؛هتعرف قيمتها فى الوقت ده ؛ لما هتكون فى غربه وساعة لما تتالم او تكون مهموم مش هتلاقى حد جمبك
مش هتلاقى ابوك وامك بيحضنوك ويخففوا عنك ومش هتلاقى اخوك واختك بيحموك ومش هتلاقى اصحابك الى بيحبوك بجد ؛ مش عشان مصلحة.
ساعتها مش هتقول كدا هتقول ياريت تلاقى نص فرصة وارجع ليها .
غلط الى قال مصر ام الدنيا لان مصر الدنيا كلها
لا انا مش معاك فى انك تحكم عليا كده لانى فعلا جربت الغربه مش بعيد عن مصر لاعن بلدى وقريتى وعرفت اد ايه البعد صعب واد ايه الفرقه مره وتقول ايه لو بعدت عن اهلها وشعبها
فعلا ربنا يقويك ويرجعك بالسلامه ان شاء الله لبلدك

السلام عليكم
انا كنت في الاول زي اي بنت مش فارقة معاها بلدها ايه ولا حتي فين
بس الحمد لله بعد انضمامي للجمعية حسيت انه لا اكييييييييييييد طبعا
في فرق وكبيييييييير اوي
هوه ان احنا شعب طيب جدا وكمان مسالم وزي ما كله اتكلم انه كل لما
بيبعد عنها بيشتقلها وبيرجعلها ويوطي علي ترابها
احنا بلد الفراعنة اللي عملو حضارة مش موجودة عند اي حد
ودلوقتي نفسي اعملها حاجه واني اشرفها زي ماانا متشرفة بيها
ونفسي اعلي رايتها ...............
هقول في الختام .....
((انا مصرية))